| |
u anahte okot ah uchben uinicoob |
| |
| k001 |
ix kolom che
u anahte okot ah uchben uinicoob zuc u betahal uay ti cahobe
maili cohoc ah zac macoob |
| k005 |
bin in dzudz a chi tu yam ix col
ix cichpam zac, yanyan a uahal
lay u anahte dzibtabi tumen yum ah bam, u ah ca uabil noh ah kulel |
| k010 |
tu cahil dzitbalche
tu haabil hunpic, hunbak, ca katun
ix kolom che okot
|
| k015 |
ah papal, ah mukaan uinic
ppizaan chimalil ca yocoloob ti chumuc c' kiuic
utial u ppiz u mukoob ti ix kolom che okot
tu chumuc c' kiuic yan hunppel xib kaxaan tu chum ocom tunich
cici bonaan yetel ix cichpam cħoh |
| k020 |
dzanen yaab lol balche utial u bocinte
bay tu tan u kab, tu yoc, tu uinclil xan
ci a uol cichcelem xib
teche a caah a uilah u yich a yumil caan
ma tu yantal a zutcech uay yokol cabil |
| k025 |
yanal u kukmelil chan dzunun
ua yanal u keulel cichcelem ceh ua ah chac mool
ua yanal u kukmelil chan ix kook ua chan kanbul
dza a uol, tuculnen chen ti a yumil caan
ma a cħa zahacil; ma lobil cun betbil techi |
| k030 |
ix cichpam ix cħuplal lakintcech ta zutucil a tal a uatan bin
ma a cħic zahacil; dza a uol ti balx cun man tech
he cu tal noh yum hol poop; ti tun u tal yetel ah kulel
bey xan Ah Ahau Can Pech he cu talo
tu xax cu tal nohoch nacom ake |
| k035 |
he cu tal batabil
cheehnen; cimcimac a uol tumen teche lay alaan tech
ca a biz u than a uet cahaloob tu tan c' cichcelem yum
lay ti dzamnilo uay ti yokol cab
dzocilil u man yaabcach kin, ti tun zalam
|
| |
| k040 |
ix okot kay ah ppum ti hul
ix pacum, ix pacum che
ti hunppel, ti cappel coox zut tu hal che ti alcab okot tac oxppel
ci likz u tan a pol; malob ppil a uich |
| k045 |
ma a mentic ix thile a uich utial ca a cħa u tohol
a ci zuzmah u ye a hul, a ci xabcheiltmah u zumil a ppum
a dzamah malob yitz ix catzim tu kukmel u yit u chibil a hul
a ci choymahaba u tzatzel xibil ceh tu muk a kab, tu muk a uoc
ta pix, ta ton, ta cħalatel, ta tzem |
| k050 |
dza oxppel alcab zut tu pachil ocom tun bonaan
lay tuux kaxaan lae xibil pal, ah zac zuhuy uinic
dza u yax ti ca zuti; cħa a ppum, dza u hul cheil toh tan tu tzem
ma kabet a dzic tulacal a muk utial a hul lomtic
ti olal ma u kilic tu tamil u bakel
utial ca patac u mukyatic huhunppiti |
| k055 |
lay u yoltah cilich celem yum ku
tu ca zut ca dza ti le ocom tun cħoh
ca a dzae, ca a hulic tu caten; laylo yan a betic
ma a ppatic a uokot
tumen bay u mentic malob chimal ah bateel uinic
tu tetal utial u dza utz tu yich yum ku |
| k060 |
lay cu tippil kin ti yokol kax ti lakin cu hoppol hul ppum kay
lay chimal ah bateil u dzaicoob tulacal
ti nohoch yum ah kulel ti cahil Dzitbalche, Ahau Can Pech |
| |
| k065 |
talen, talen tu tan a kancheil
in nahma tech a cici olal ah cichcelem in yum
tumen tech ca dzic u malobil utzil baal yanal a kab
yan a utzil lohil than
ten cin uilic baax utz yetel baax kaz uay te luumil |
| k070 |
dza ten a zazil in hahal yum
dza ten yaab naatil ti in tucul yetel ti in naat
utial ca in chinchin hol tech zanzamal kin
likic u pul yail u uey cizin tin uokol
ua ma hah baax cin tzectic techi |
| k075 |
cimic in na, cimic in yum, cimic in col, cimic in ualak
ua baax cin tzolic in yum cin bahah ten
cin katicech cichcelem yumil caan, nohochech ta cuchil ti caanal
ley cin tzicech cichcelem Hunab Ku
tech ca dzic utzil bey kazil baal uay yokol cabe; ten thancech
|
| |
| k080 |
kamal than ti u yum lath kab tunoob
in yumileex, cin tal chen chinchin u tanil in uich
dzoc bolon kin ma in tumtah mix ilmah ix cħupil
mix in cħa u coil kaz tuculil tin otzil naatil |
| k085 |
tumen cin tal yetel in tumben uit, in tumben pix in tzemil
yetel xan yan ca uile in yum ten ma tin caxtic u kazil keban
tu tan a uich in hahal yum Hunab Ku
laybetic chen zacanzac in pixan in tal in uilech ta cuchil
tumen ti tech cin kubic tuliz in uolal
yetel in tucul uay yokol luumile |
| k090 |
ti chen tech cin ci alah yoltic uay te yokol cabil
tumen tech nohochil kin ca dzic utz uay yokol cab ti tulacal baal
yan u cuxtal tumen tech
dzanech a lath ley u luumil tuux cu cuxtal tulacal uinic
yetel tech u hah lohil ca dzic utzilil
|
| |
| k095 |
payal chi ah cit bolon tun uinalte ah miatz
uinalte payal chi ah miatz dzac ya
ti yanal pomolche kax, bec kax |
| k100 |
in tikalhom cħic luum pak bacalche yetel bohom
bey lakin, bey xaman, bey chikin, bey nohol
ti cu tal tu canppel xay beil caan
tuux yan u poopil nail bel ah miatz Hunab Kui
lay cu kahzic ti uinic tahan cuxtal uay yokol cab |
| k105 |
ti maxac u kat u dzauba tu yol ah cambal uay ti luumil
yan u dzic u toh yolal tumen u yumil kak, ha, ik, yetel luum
u yumil uay yokol cab
tulacal baal mentahan tumen yum Hunab Ku
leti cu dzic utz yetel kaz ichil malob yetel lob |
| k110 |
tumen leti cu dzic u zazilil yokol cab
tumen leti u yumil tulacal baal yan yanal u kab
bey kin, bey ah :U:, bey ix budz ek, bey u lol zaz caan
bey muyal, bey chac, bey ah ix lelem,
bey ah uz, bey cħicħ, bey balche
|
| |
| k115 |
u uayab haab; ti kail kin ek
u kinil ti okol, u kinil kazil baal
chacab cizin, hekab mitnal
minaan utzil, chen yan lobil, auat, yetel okol |
| k120 |
dzoc u man hunppel tuliz haab, lay u haabil kabaan lae
helelae cu tayba xan hunkal kin, ixma kaba kin
u yail kin, u kinil lob, ek kinoob
minaan ix cichpam zazilil tu yich Hunab Ku
utial u palil uay yokol cab
tumen ti lay u kinoba tun u ppizil u keban yokol cab |
| k125 |
tulacal uinic, xib yetel ix cħup, chichan yetel nohoch
otzil yetel ayikal, miatz yetel num
ahau can, ah kulel, batab, nacom, chacoob, chunthanoob, tupiloob
tulacal uinic helelae cu ppizil u keban ti le kina
tumen bin u kuchuc u kinil lay ti le kina u dzoc yokol cab |
| k130 |
tumen tu bizic u xocol tulacal u keban uinicoob uay ti luume
tumen ti u dzic hunppel ix nuc homa betaan yetel u kat ah kamaz
tulacal u yaalil yich le max cu yokticoob u lob cu mental tiob
uay ti luum lay can tulnac le ix nuc homa cu dzoc
|
| |
| k135 |
kiliz tup yok uitz
kat man kin tu hal caan ti chikin
tunkul, hub, zacatan, zith, hopz, ix kay luch, xixtun,
tulacal pax tu tazahal |
| k140 |
dzoc ix ppit tun cu bin u kuchul tu tan le poopil na yum ahau can
ti yan xan ah hol poop yetel ah chacoob
bey yum ah kulel yetel u antah ah dzaob
dzu kuchul ah pax kayob, ah pal dzamoob, ah okotoob
ah ualak zutul zithoob bey ah ppuzoob yetel ah nacyaob |
| k145 |
tulacal u uinicil cu tal tu pach ah ahau can
tu cimac olal cu betabal tu chumuc kiuicil le c' cahtalil
dzu hoppol yocol kin tu hal na caan; tu tibital u hoppol lay kin
yumil caan, kamic u budz kak utial u chiltal u yich yum kin
coneex coon ti chum yaxche |
| k150 |
coox dzaic c' kex utial tumben haab
dzoc u man u yaya kinil
coneex u multambail cahalil
coneex ti lakin u dzay u ix ocom cheil kiliz kam kak yokol uitz
talezeex tulacal baal tumben; puleex tulacal baal uchben |
| k155 |
yum ku dzu dzic ca c' manzic u lobil kin uay ti cahalil
tumen tal u caah ulak kin, ulak uinal, ulak haab, ulak katun
utial u tal u chucpahal hunkal haab utial katun
coneex c' dzaic tumben xul tun tu hol cahnalil
c' caxtic zac tunich utial c' ezic ulak haab dzu man
|
| |
| k160 |
u kay ah baldzam
kin kuilancil ti cahnalil
u caah tippil u zazilil kin tu hal caan
ti cu bin bey ti nohol bey ti xaman bey ti lakin bey xan ti chikin |
| k165 |
ti tun tal u zazil yokol cabil; ekhocħen ti yulel u dzic macil
ix kuluch yetel maaz yetel cħic
yetel ah koxol yetel ix dzunun cu yalcab tu cuchil
ix bach, ix zac pacal, tzutzuy, nom,
chan becħ, ix kook, ix zac cħicħ
calicil ah zay cu yalcab ti oklen |
| k170 |
lay u kaxil cħicħ cu hoppzic u kay
tumen heb ziyan u zen utzil ix cichpam ek
hoppaan yok kax cu budzilanca Lamat
u tal u cimil :U: yok yaxil kax
cimac olilil u kin kuil lay uay te ti cahalil |
| k175 |
tumen tumben kin cu tal zaztal ti tulacal uinicil ti cah
mulba uay ti cahalil
ah tzab can, Ah Kukul Can
ah uapachoob yetel ah ppuziloob |
| k180 |
ti tech uinic cin tal in ualic tech baaxten uay peten,
uay chakan, uay ti luum
c' uchben ah uapach uinicoob hebix xan ah ppuziloobP
ma licil u cohoc te luumoob mixmac mix uinic bay yanoon |
| k185 |
dzoc u yantal lemcech yaab kin uay cu ximbancuba ix ah chapat
hun uuc u tichil u pol yat
chen leti ca uilic u katal ta bel utial u hantcech
yetel utial u dza tech lobil ta cuxtal
ua ma ta naatic baax cu katic tech |
| k190 |
ma tun he ca kuchul u kinil u yantal max cu alic tie
ca tu yubahe ca dzicinahi
tumen leti max cu chahal u dzic lay u nuctah tie ix ah chapat
leti cu nuce tie laybetic hach tu cħa lobile
baax cu dzic u yal nucah tie tumen tabzabil tumen |
| k195 |
dzu lan kabet u ppizil u xocol ua hayppel haab ua katun kin
manac le u kinil uay te cahoba le ah nucuch chac uinicoob
letiob likzahoob u pak le uchben cahoob
hela c'ilic uay peten, uay chakan |
| k200 |
tulacal le cahoob thithaanoob yok luum uaye
hela tan'c ilic thuchenthuch yokol caanal uitzoob
lay cu talzic ti uay ti cahoob ca dzic u thanil baalba
lay c'ilic hela baax c'ohelmah
tumen zanzamal c'ilic ti chumuc caan u chiculil |
| k205 |
baax alaan toon tumen ah uchben uinicoob
uay ti cahale, uay ti luumile
ti cu dzic u hahil c'ol
utial ca patac xocic u baal yan ti yich le caan yocol akab
bay tu chun tu chumuc bey ua tun chinil tan caan zah
|
| |
| k210 |
ti tu belil ua u tal kin uaye
ti ca kay chan zac pacal tu kab le yaxche
ti yan xan ix cipchoh, chan ix chuleb,
bey xan ix kukum, lay zac cħicħ
tulacal cimac yoloob u yalakoob yum ku |
| k215 |
hebix xan colelbil yan yalak; he ix chan mucuy, ix chan chacdzidzib
yetel xan chinchin bacal, lay xan ix dzunun
lay ix u yalak cħicħ ix cichpam xunan colelbil
lay ua yan cimac olal ichil lay balcheob
baaxten ma tu cimactal yol toon ua beyilo |
| k220 |
letiob tac tu zaztal ppencech hadzutzoob
chen kay, chen baxal cu man tu tuculoob
yan in dzudz a chi tu cap col hok che |
| |
| k225 |
dzaex a hadzutz nokeex
dzoc u kuchul u kin cimac olil
xelch u tzootzel a pol, dza u lemcech cichcelmil a nok
dza a hadzutz xanab, cħuycinzah a nucuch tup tu tupil a xicin
dza a malob bocħ, dza u kexiloob a ix cichpam cal |
| k230 |
dza u bakal hopenhop tu nak a kab
ti kabet ca ilac cichpamech hebix mace uay tu cahil dzitbalche cah
in yacunmaech ix cichpam colelbil
laybetic in kat ca ilabech hach zempech cichpamech
tumen yan a chicpahacech ti ix budz ek |
| k235 |
tumen ca u dzibol tech tac le :U:e yetel u ix lol nicte kax
chen zacanzac a nok ix zuhuy
xen a dza u cimac olil yetel a cheeh
dza utz ta puczikal
tumen helelae u zutucil cimac olil tulacal uinic
lay cu dzaic u yutzil ti tech
|
| |
| k240 |
kay nicte
ix cichpam :U: dzu likil yok kax
tu bin u hopbal tu chumuc caan
tuux cu cħuytal u zazcunzah yokol cab |
| k245 |
tulacal kax chen cici u tal ik, u udzben boc
u dzu kuchul chumuc caan
chen zac thin cab u zazilil yok tulacal baal
yan cimac olil ti tulacal malob uinic
dzoc c' cohol tu ichil u nak kax |
| k250 |
tuux mixmac u men max hel u yilcoon le baax c' tal c' bete
ti tazah u lol nicte, u lol chucum, u lol udzub, u lol ix mumila
ti tazah pom, zit, bey xan ix coc box, bey xan tumben hiib tok
yetel tumben kuch, tumben luch, bolon yax tok,
tumben pechech, tumben xoth |
| k255 |
bey xan u can ix ulum, tumben xanab, tulacal tumben
lay xan u kaxil c' hol utial c' ppoc nicte ha
bey xan c' hopzah hub bey u ix kiliz
dzocilil ti yanoon tu dzu kax tu chi noh haltun
utial c' paat u hokol ix cichpam budz ek yokol kax |
| k260 |
pit a nokeex, lukz u kaxil a holeex
betaaneex hex cohiceex uay yokol cabile ix zuhuy ix cħupalelexe
coox c' kam nicte |
| |
| k265 |
cimac olalil tan'c kayic tumen bin'c caah c' kamic c' nicte
tulacal ix cħup yetel ix lokbayen chen cheehlah
cheehlamec u yich, tu zith u puczikal tu dzu u tzem
balx tumen;
tumen yohel ti yolal u dzic u zuhuy colelil ti u yacunah
kayeex nicteil |
| k270 |
ca yantceex nacom yetel noh yum ah kulel,
ah tan kanche ah kulel kak
coneex, coneex c' dza c'olalil
tu tan ix zuhuy ix cichpam zuhuy colelbil
u lolil ix lokbayen tu caanal kanche colelbil ix men zuhuy kak
bey xan ix cichpam ix kan le ox, ix cichpam ah zoot
yetel ix cichpam colel ix zuhuy ix thoth much |
| k275 |
letie cu dzic utzil cuxtalil uay yok petene, uay yok chakane,
tu zut luumil uay uitzil
coox, coox; coneex palaleex
bey c' dzaic cici cimac olil
uay Dzitil Pich, uay Dzit Balche
|
| |
| k280 |
u yaya kay ah otzil ix ma na; ix pom okot cħek
hach chichanen ca cim in na, ca cim in yum; ay, ay, in yumen
ca tun ppat cen tu kab, tu yicnal in lak
mixmac yan ten uay yokol cab; ay, ay, in yumilen |
| k285 |
cu man cappel kin cu cimil ten in lak
tin thuluch ca ppat cen tin thuluch hun; ay, ay
dzu man lay kin tin hun ppat cen
ca tu han cħaen u bizen hunppel dzul tu kab; ay, ay, in yumilen
lobil, hach yaab yayaab lob tin manzic uay yokol cab |
| k290 |
mix ua bikin bin hauac in uokol
mix in uonel yan; hach chen tin hun, chen bey in man uay tin luum
kin yetel akab chen okol, okol, xupzic in uich
lay xupzic in uol, yan lob hach chich
ay in yum; cħa ten otzilil, dza u tibil ti le yah mukyaa |
| k295 |
dza ten u dzoc cimilil ua dza ten toh olal in cichcelem yumil
otzil, otzil; u colba tu hun yok luum
ua yan ca u kat tu thuluch hun katmenkat tu hol na nail
tulacal mac cu ilic helelae cu dzic yacunahil
minaan yotoch, minaan u nok, minaan kak |
| k300 |
ay in yum; cħa ten otzilil
dza ten toh olal utial ca patac in mukyatic |
